ஜெய்ஹிந்த் சுந்தர்………..

 ஜெய்ஹிந்த்

சுந்தர்………..

ஜெய்ஹிந்த் என்றுதினம் சொல்வோம் - நாம்

இந்தியர் என்றோங்கிக் கூவிக் களிப்போம்

பொய்முந்தி வைத்திங்கு பேசும் - சிறு

புல்லரைக் கீழ்தள்ளிப் போட்டே மிதிப்போம்

செய்வினை செய்திங்கு வைப்பார் -இவர்

செய்யாத துயரில்லை போட்டுத் துவைப்பார்

பொய்வினை பலவிங்கு ஆற்றி - நாளும்

பிரிவினை பேசிநம் மானம் சிதைப்பார்

தமிழென்ற மொழியொன்று கொண்டோம் - அதன்

தம்பிகள் எனநூறு நாடெங்கும் கண்டோம்

அமிழ்தென்று சொல்லித்தேன் உண்டோம் - இவை

அத்தனையும் ஒருதாயின் உதிரமே கண்டோம்

இந்தியும் சமஸ்க்ருதமும் உண்டு - இன்னும்

இவையோடு மொழிநூறு நாடெங்கும் உண்டு

சொந்தமே நமக்கென்று கொண்டு - வைடா

சொல்லாத வர்வாயில் பெரிதொன்று குண்டு

வடக்கென்றும் தெற்கென்றும் சொல்லிப் - பிரிக்கும்

வழக்கொன்றை நாட்டிலே இன்றே ஒழிப்போம்

கிழக்கென்ற திசையார்க்கும் ஒன்று - வெள்ளிக்

கீற்றென்று வெளியில்வர இன்றே முழிப்போம்

கூவியே சொல்லுவது ஜெய்ஹிந்த் - எங்கள்

குரல்வளை நெரித்தாலும் கூறுவது ஜெய்ஹிந்த்

ஆவியே போனாலும் ஜெய்ஹிந்த் - அந்த

ஆண்டவன் தடுத்தாலும் பாடுவது ஜெய்ஹிந்த்